“WAAK EN WERK” (Uittreksel uit die jaarblad van 1946):
Die leuse van ‘n skool is die uitdrukking van sy hoogste ideaal. Hierdie leuse is die krag wat rigting gee aan die inwendige groei en ontwikkeling. Dit vertolk eweneens die eksterne doelstellings van die skoollewe en vorm dus ‘n advertensiebord waardeur die doel, die strewe, en die prestasies van ‘n skool bekendgemaak word. Hoërskool Louis Trichardt, en dus die Soutpansbergse Hoërskool, het onlangs ‘n voldonge feit geword. Soutpansbergers is trots op hulle skool. 

Dit is voldoende bewys deur die groot belangstelling wat oral in die distrik getoon word, vanaf die Limpopo tot “agter die berg tot verder vorentoe”. Die Hoërskool stel hom tot diens van die volk en sal waak oor die tradisies waarop ons ons ideale bou. Soos Hanglip oor die Soutpansberg heers en wag oor die Noordelike boswêreld en Suidelike vlaktes, sal die Hoërskool aspireer om ‘n wakende oog te hou oor sy leerlinge. 

Ons durf nie net ons oë op Hanglip te vestig nie, want dan sal ons struikel oor hindernisse wat ons in die onmiddellike nabyheid nie raak sien nie. Ons sal werk om hierdie hindernisse te oorkom, ons sal strewe na karaktervastheid, na verstandelike, geestelike en liggaamlike ontwikkeling. 

Ons glo, soos die ou Romeine, in die leuse: “Mens sana in corpore sano” (‘n Gesonde gees in ‘n gesonde liggaam). Die Bybel sal ook dien as gids vir ons hede en ons toekoms. Ons sal waak en werk.